O periódico monolingüe As burgas. Literatura e Arte, os termos xurídicos devindicar e devindicación e o libro Proezas de Galicia, entre os novos destaques comentados. 

Imaxe da portada do semanario As Burgas.
 

Non hai dúbida ningunha de que o verbo devengar e o substantivo deverbal devengo son na súa forma, no seu significante, claros castelanismos que non contan con tradición na historia lingüística galega. O problema preséntase cando precisamos adoptar unha ou máis voces para designar os conceptos xurídicos que eses termos expresan. Ante esta situación, a RAG optou por acuñar unha nova proposta: devindicar e devindicación. Esta solución xa foi incorporada ao Dicionario da Real Academia Galega e ao Dicionario Xurídico Galego.

O compositor Marcial del Adalid y Gurrea naceu na Coruña, en 1826. Xunto con Andrés Gaos e Juan Montes, Adalid é o principal representante dun auténtico Rexurdimento musical galego. A filla do músico, dona María del Adalid, fixo unha xenerosa doazón á Real Academia Galega, no ano 1929, consistente nun grande e traballado armario do século XIX cun auténtico tesouro no seu interior: a biblioteca musical de seu pai.

No ano 1894 viu a luz en Ourense un novo periódico monolingüe: As Burgas. Literatura e artes. Os seus responsables eran moi conscientes do baleiro deixado pola desaparición d'O Tio Marcos d'A Portela ou d'A Monteira, e así o manifestaron nas páxinas da revista para salientar a necesidade dunha nova cabeceira en galego. Máis en concreto, eles explicaron que o motivo para publicar As Burgas era o de fomentar a afección por ler e escribir en galego, e tamén a divulgación da literatura feita na lingua do país. 

A familia Candeira procedía de Ponteareas, onde se dedicou ao negocio da madeira que lles permitiu acadar un alto nivel económico. A importancia do seu labor industrial ou mesmo os méritos intelectuais da familia non son, porén, o que levaron aos Candeira a formar parte da nosa historia. No veleiro de nome 'Constantino Candeira' fixo as súas prácticas de pilotaxe un rapaz de Rianxo, alumno da Escola náutica de Vigo...

No ano 1810 saía á luz Proezas de Galicia, a primeira obra de autor coñecido impresa en lingua galega. Eran os tempos da guerra contra o francés, e o combate non se exercía só coas armas. O propio autor da obra, José Fernández y Neyra, loitara ás ordes do Marqués da Romana, trasladando despois ao papel episodios históricos baseados nas súas propias experiencias.