Arquivo da Real Academia Galega

O Arquivo da Real Academia Galega está constituído pola documentación xerada e recibida pola institución no exercicio das súas funcións e actividades e conservada para a xestión, a información, a cultura e a investigación. A súa orixe data da fundación da RAG, en 1906, e constitúe unha fonte fundamental para o coñecemento da historia da institución -organización, finalidades, traballo, conexión coa sociedade, etc.- e dos seus membros.

Conserva, asemade, os arquivos que gardan a documentación persoal, familiar e profesional dos intelectuais que, co pasar do tempo, fixeron doazón dos mesmos á RAG. Entre eles destaca o de Emilia Pardo Bazán, que contén tanto os seus manuscritos literarios como unha sección patrimonial de grande interese. Tamén conserva a RAG os de Andrés Martínez Salazar, Murguía, Pondal e doutras figuras destacadas da historia cultural galega do último século.

Os arquivos de empresas, asociacións e institucións, aínda que en menor cantidade que os anteriores, tamén están presentes nos fondos da RAG.

As coleccións, recibidas, compradas ou producidas pola propia institución, compoñen a última sección dos fondos do Arquivo. 

O acceso, tanto aos arquivos persoais, empresariais, de asociacións e institucións, como ás coleccións, é libre para investigadores e cidadáns en xeral, agás no caso de materiais que, polas súas características -rareza, conservación, etc.-, precisen a autorización da Comisión Executiva.

O Arquivo está rexido por un regulamento específico, pendente de aprobación polo Pleno, no que se establecen as normas de recepción, custodia, conservación e acceso relacionadas cos documentos.

A figura do arquiveiro-bibliotecario é a responsable da adquisición e conservación dos fondos tanto arquivísticos como bibliotecarios, así como de informar ao Pleno, conforme o artigo 28 dos Estatutos.